Ginmando ni President Ferdinand “Bongbong” Marcos Jr. ang pagtukod sang inter-agency task force nga magaseguro sa kalinong kag kahilwayan sang Negros Island.
Sa Administrative Order No. 6 nga ginpirmaan Abril 3, ginamanduan ang mga may kaangtanan nga ahensya sang gobyerno sa pagtapna sa paglapta kag paglala sang bayolensya sa bisan diin man nga bahin sang Pilipinas, kasubong man ang pagmentinar sa kalinong kag kahilwayan sa Negros Island, samtang ginahatagan sang pagtahod ang fundamental civil kag political rights sang mga tawo.
Sila ang ginmanduan man nga pasanyugon ang kampanya batok sa private armed groups kag loose firearms.
Ang task force ang ginpangalan sunod kay late Negros Oriental Gov. Roel Degamo, nga ginpatay upod sa walo ka iban pa sa pagpang-atake sa mismo nga puluy-an sang opisyal sang Marso 4.
Ang Task Force Degamo ang pamunuan ni Interior and Local Government Secretary Benhur Abalos bilang chairperson, co-chair naman sanday Justice Secretary Jesus Crispin Remulla kag National Defense Secretary Carlito Galvez Jr.
Ang mga commanders sa task force ang pagalakipan naman nanday Philippine National Police (PNP) Chief General Rodolfo Azurin Jr., Armed Forces of the Philippines (AFP) Chief-of-staff General Andres Centino kag National Bureau of Investigation (NBI) Director Medardo De Lemos.
Ginmanduan man ang Department of Social Welfare and Development (DSWD) sa pagpalab-ot sang emergency relief assistance sa mga pamilya sang biktima samtang ang Department of Health (DOH) ang magahatag naman sang psychological rehabilitation sa mga apektado nga indibidwal.
Ginmanduan man ang Presidential Assistant for the Visayas sa pagkoordinar sa task force sa tinutuyo nga ma-enlist ang bug-os nga suporta sang mga stakeholders.
Sa idalum sang Administrative Order No. 6, ang task force ang may-ara sang gahom sa pagkoordinar kag rationalize sang efforts sang mga concerned government agencies kag instrumentalities agud maseguro ang whole-of-government approach sa pagtapna, pag-imbestigar, prosecution kag paghatag sang silot sa mga nagabuhat sang bayolensya sa Negros Island.
