Nakafull alert na ang Sagay City Police Station kadungan sang ginalauman nga pagdagsa sang mga tumuluo ilabi na sa Vito Church kadungan sang obserbasyon sang Semana Santa.
Sa interview sang Bombo Radyo kay Police Lt. Col. Roberto Indiape Jr., hepe sang Sagay City Police Station, preparado na ang deployment sang ila mga personnel kaupod ang koordinasyon gikan sa mga barangay, force multiplier kag traffic enforcers agud ma-kontrolar ang lakat sang aktibidad.
Suno diri, pagabantayan man ang lakat sang byahe sang mga public uitility vehicle kag private cars nga indi maggutok ang dalanon kag parking lots.
Bantayan man sang mga personnel ang national highway nga suno kay Indiape, yara ang presensya sang Sagay City Police Station kag Escalante City Police Station nga nakaestasyon sa boundary sang duha ka ciudad.
Ginalauman man ang pagdagsa sang mga tawo gikan sa nagkalain- lain nga lugar lakip na diri ang Cebu kag bahin sang Negros Oriental.
Pahanumdom sini sa mga pumuluyo nga kun magbakasyon ukon maghalin sa ila puluy-an, mas maayo kun may bilinan nga magbantay.
Panugyan sini nga indi na magdala sang dako nga kantidad sang kwarta kag alahas sa area nga may madamo sang tawo.
Ginpahanumdom man ni Indiape nga mainit ang tiyempo kag kun maglain ang pamatyag, indi na lang magpadulong sa simbahan ukon sa crowded area kag suno diri, mas maayo nga likawan na lang ang pagdala sang bata.
