Ginpasalamatan ni Negros Oriental Governor Carlo Jorge Joan “Guido” Reyes kag iban pa nga mga lokal nga opisyales si President Ferdinand “Bongbong” Marcos Jr. sa paghuman sang joint special task force nga nagatuyo nga mamentinar ang kalinong kag kahilwayan sa Negros Island.
Pahayag ni Reyes nga ginapasalamat sini ang pagpagwa sang Administrative Order No. 6,, nga para sa iya “welcome development” kasunod sang assassination sa iya nga kaalyado kag predecessor nga si late Governor Roel Degamo.
Dugang pa niya nga ini ang nagapakita sang madasig kag decisive capability sang national government kasubong man sang sinseridad sang Presidente kag sang iya nga mga Department Secretaries sang sila ang nagpromisa nga indi magapahuway tubtob nga maserbe ang hustisya.
Dugang pa sini nga nagakaigo lamang nga tribute para sa anay gobernador nga ginpangalan sa iya ang task force nga ginmanduan para sa importante nga misyon.
Nahibaluan nga si Reyes ang nagpapili nga bise gobernador sa partido ni Degamo sang May 2022 polls kun sa diin siya ang nagdaog.
Ginpasaka naman ini sa pwesto bilang gobernador matapos ang assassination kay Degamo sang Marso 4.
Pahayag naman ni Pamplona Mayor Janice Degamo, ang balo ni Governor Degamo, nga ang pagtukod sang task force nga nakapangalan sa iya nga bana ang makabig nga long-term solution para sa peace and order situation sang Negros Oriental.
Sa team nga ginabug-usan sang Department of the Interior and Local Government (DILG), Department of Justice (DOJ), National Bureau of Investigation (NBI), Armed Forces of the Philippines (AFP) kag Department of Social Welfare and Development (DSWD), nakita sang alkalde nga ang plano sang national government sa pagpabilin sang kalinong kag kahilwayan sa probinsya ang indi lamang short term.
Samtang ginpahayag naman ni Vice Governor Manuel “Chaco” Sagarbarria, nga nagapakita lamang sang pagpakig-unong ni Presidente Marcos npara sa Negros ang pagtukod sini sang Special Task Force Degamo, gani pasalig man sini nga iya nga padayun nga suportahan ang tikang ilabi na nga ini ang para sa kaayuhan sang mga pumuluyo.
