Preparado na ang Bacolod Police Station 1 sa pagbantay sa mga simbahan ilabi na sa patigayunon nga prosesyon subong nga Semana Santa.
Sa interview sang Bombo Radyo kay Police Major Elmer Bonilla, station commander sang Bacolod Police Station 1, bilog nga semana ang ila preparasyon ilabi na sa San Sebastian Cathedral kun sa diin ginalauman ang pagdamo sang mga tumuluo.
May ginbutang man sang police assistance desk bangud ginalauman nga madamo ang magapadulong sa Simbahan para sa Visita Iglesia.
Suno kay Bonilla, halin sa aga tubtob sa gab-i ang deployment sang kapulisan kag may mga ginpang-augment man sa mga mayor nga commercial establishments sa downtown area.
Suno sa iya, nakafocus ang deployment sang kapulisan sa mga Simbahan, downtown kag sa plaza.
May mga medical team man sa mga simbahan in kaso nga may maglain ang pamatyag.
Nagapanugyan ang station commander sa mga tumuluo nga basic commodities lamang ang dal-un sa Simbahan kag magdala sang tubig.
