Ginkumpirmar ni Very Rev. Fr. Fransisco D. Perez nga kahapon kadungan sang ginpatigayon nga Chrism Mass sa San Sebastian Cathedral, ginpatigayon man ang renewal of vows nila nga mga kaparian sa Diocese of Bacolod.
Ginkumpirmar man ni Father Perez nga indi na siya ang Parish Priest sang Triumph of the Holy Cross Parish bangud siya ang igasayluhon na sa Sr. Sto. Niño Chaplaincy Helvetia Heights Diocese of Bacolod apang malapit lamang ini bangud yara man ini nahamtang sa Barangay Villamonte syudad sang Bacolod.
Nagpasalig man ini nga ang programa sini kada Domingo sa Bombo Radyo ang magapabilin apisar nga naglain na ang pagaserbehan sini nga parokya kasunod sang patigayunon nga reshuffling sang mga kura-paroko kag mga kaparian epektibo sa bulan sang Mayo subong nga tuig.
Samtang, bangud magaretiro naman si Msgr. Felix Pasquin sang Our Lady of Candles Parish siya ang pagatal-usan ni Rev. Fr. Jonas Y. Sumagaysay.
Sa mensahe ni Very Rev. Fr. Fransisco D. Perez, kahapon adlaw sang mga pari kag ginpatigayon man ang pagpanghugas sang tiil sang mga apostoles kun sa diin nagarepresentar sang pagkakas sang higko bangud ang tiil ang ginagamit sa paglakat bisan diin gani sa atun nga pagpanglakaton makasugata kita sang madamo nga higko.
Suno kay Fr. Perez, likawan naton ang pagpanghusgar sa atun nga isig-katawo sabaylo dapat natun sundon ang Ginoong Hesus nga wala nagtulok sa itsura sang mga apostoles nga ginhugasan sini ang mga tiil agud nga mangin malimpyo.
Nagakadapat man sa panahon sang euchrastiya kita ang maghatagay kag likawan ang pre-judge sa mga tawo ukon indi kita manghusgar santo sa nakita naton sa pisikal bangud ang tagsa katawo ang may kinaiya nga may yara sang maayo kag indi.
Subong nga kwaresma dapat naton nga panumdumon ang ginpahayag ni Ginoong Hesus nga Himua ninyo ini sa akun handuman, gani ang paghatagay, pagpaambitanay kag paghugasay sang mga tiil ang dapat natun himuon sa handumanan sang atun Ginoong Diyos.
