Yara na sa maayo nga kahimtangan ang isa ka katapo sang 79th Infantry Battalion sang Philippine Army matapos nagluntad ang engkwentro sa tunga sang mga ini kag katapo sang New Peoples Army sa Sitio Sirahe, Barangay San Isidro, Toboso, Negros Occidental.
Sa interview sang Bombo Radyo Bacolod kay Lt. Col. Jjay Javines, commander sang 79th Infantry Battalion, Philippine Army, nagluntad ang engkwentro alas 4:00 ang takna kahapon matapos nga makabaton sang report ang mga otoridad nga may yara sang presensya sang mga armado nga grupo sa lugar kun sa diin nagapanago.
Suno kay Javines, nagresponde man ang tropa sang gobyerno kun sa diin nakaengkwentro sang mga ini ang kapin napulo ka mga katapo sang New People’s Army kag nagdugay ang engkwentro sang kapin 20 minutos.
Suno 79th IB commander, grupo ni Arnel Tapang ang naengkwentro sang tropa.
Suno naman sa informant sang mga otoridad may yara sang tatlo ka nasamaran sa hanay sang NPA apang ginaverify pa nila ang report.
May yara man sang narekober sa encounter site sang subersibo nga mga dokyumento kag 2 ka shot gun.
Suno kay Javines, wala sang evacuees sa nagluntad nga engkwentro.
Nagpanugyan man ini sa mga sibilyan nga indi magsulod sa encounter site sabaylo magpakig-angot sa barangay officials agud nga maassist kag mapahibalo ang mga tropa sang gobyerno nga magapadulong ang mga ini sa lugar agud mag-atipan sang ila mga sapat kaangay sang karbaw agud man malikawan nga madalahig.
