Ginaduso sa Sangguniang Panlungsod ang pagpatigayon sang tatlo ka adlaw nga Manokan Country Inasal Festival in the City of Bacolod agud nga mas makaganyat sang madamo pa nga mga turista nga magpadulong sa syudad.
Ang ordinansa ang gin-author ni Bacolod City Councilor kag Chairman sang Committee on Tourism Jason Villarosa kag ginco-author ni Councilor Celia Flor.
Sa interview sang Bombo Radyo Bacolod kay Councilor Celia Flor, paagi sa ordinansa patigayunon ang nasambit nga festival sa ulihi nga weekend sa bulan sang Mayo agud masadya bangud madamo sang mga tawo ang nagalagaw sa tion sang weekend.
Ang tinutuyo sang festival ang pagpromote sang Manokan Country indi lang sa syudad sang Bacolod kundi sa bilog man nga Pilipinas.
Suno kay Flor, ginaplanuhan sang syudad sa karun ang pagpatigayon sang mga nagkalain-lain nga activities sa tatlo ka venues nga ginalakipan sang Manokan Country, Upper East kag North Capitol Road.
Pila sa mga ginaplano nila nga aktibidad amo ang palaba-laba inasalan sang Manok kag contests paghimo sang mga putahe nga gamit ang inasal nga manok.
Ginaagda man kag nagahingyo ang konsehal sa mga pumuluyo sang kaiping nga kabanwahanan sang Bacolod City kasubong man mga katupad nga probinsya nga padulungan kag updan ang syudad sa pagselebran sang Manokan Country Festival.
Nahibaluan nga ang ordinansa ang napasar na sa 1st reading sa Bacolod City Sangguniang Panlungsod.
