Napasa na sa City Legal Office ang ngalan sang anom ka empleyado sang ciudad sang Bacolod nga nagalantaw sang TV samtang yara sa oras sang duty.
Sa interview sang Bombo Radyo kay City Administrator Atty. Pacifico Magahari III, yara na sa City Legal Office ang pangalan sang anom ka empleyado kun sa diin lima diri ang regular employee sang siyudad kag isa amo ang Job Order nga ginkakas na sa trabaho.
Suno diri, nagaproseso na ang City Legal agud mapasa sa lima ka empleyado ang notice to explain ukon show cause order kag pagabasehan gikan sa sabat sang lima kun ano ang proper nga disciplinary action ang idagdag sa lima ka empleyado nga ginalauman subong nga semana madesisyonan na.
Sa 133 nga kabug-usan nga numero sang TV nga yara sa Bacolod City Government Center, madamo naman sang na surrender apang nahulat pa ni Maghari ang lista kun pila ang yara sa ila kustodiya.
May yara man sang nagpadala sang sulat kay Bacolod City Mayor Alfredo Benitez, nga sila I-exempt nga kuhaan sang TV bangod nga ini ang kinahanglan sa ila tarabaho kaangay kun may Webinar ukon digital presentation.
Sa karun, ginakonsiderar sang alkalde ang request nga ihatag sa Department of Education kag mga opisina nga nagakinhanglan para gamiton sa trabaho ang mga ginkumpiskar nga mga TV.
