Pasado na sa Sangguniang Panlungsod ang ordinansa nga nagahatag sang libre nga maintenance sa mga indigent senior citizens nga nagasuprer sang diabetes ukon high blood pressure.
Sa interview sang Bombo Radyo kay Councilor Celia Flor, ang isa ka senior citizen ang dapat nga magpacheck-up sa Barangay ukon City Health Center kun kinahanglan sang prescription ukon reseta.
Ini ang iga-enroll sa barangay health center nga amu ang maga-issue sang rekomendasyon sang releasing sang bulong.
Suno kay Flor, kapin P4 million ang initial budget para diri kag ini ang igalakip sa deliberasyon para sa 2024 budget sang ciudad kag igaimplementar sa masunod nga tuig.
Suno diri, ang mga senior citizen ang isa sa mga pinaka-vulnerable nga sector sa sosyodad kag kinahanglan sang mga ini sang resources para sa ila survival.
Magluwas diri, posible nga may ihatag pagid nga dugang nga benepisyo para sa mga ini ang ciudad.
Ginakalipay naman ni Mary Lamadre, isa ka senior citizen sa Libertad Public Market ang nasambit nga ordinansa.
Suno kay Lamadre, 63-anyos, siya ang nagasuprer sang diabetes kag high blood pressure.
Suno sa iya, wala ini nagapacheck-up bangud igarekomendar gihapon nga siya ang magbakal sang bulong nga mabudlay para sa iya bangud kulang ini sa budget.
Suno diri, may mga nagahatag man sa iya sang vitamins kag bulong apang masami ini nga nagakalipat nga mag-inom.
Maayo para sa iya ang ini nga inisyatibo ilabi na sa karun nga mainit ang tiyempo kag libre lamang ini.
Suno kay Lamadre, kun ini ang matigayon, siya ang willing gid nga mag-inom sang maintenance basta may yara lamang sang magaremind sa iya.
