Nagapanugyan ang isa ka surgeon sa Teresita Lopez Jalandoni Provincial Hospital nga indi mag-istorya ukon indi magkadlaw samtang nagakaon agud malikawan ang pagkadunlan.
Ini matapos nadulaan sang kabuhi ang isa ka Grade 2 student sa Cadiz East Elementary School matapos gina-alegar madunlan sang Biyernes sang aga.
Sa interview sang Bombo Radyo kay Dr. Vicente Iturriaga, ang ini ang kaso ang makabig nga emerhensya kag sarang nga matabo sa tanan, kabataan man ukon adults.
Suno kay Iturriaga, ang trachea kag ang esophagus, nga amu ang ginaagyan sang pagkaon ang tuparay lamang.
Suno sa iya, kun nagakadlaw ang isa ka persona nga may unod ang iya baba, posible nga magtalang ang pagkaon sa airway ukon trachea.
Makabig na nga emerhensya kun completely obstructed ang trachea kag dapat may yara sang magaperform sang Heimlich maneuver kun sa diin matindog sa likod sang pasyente, ibutang ang kamot sa sulok-sulok sini kag alsahon nga may pressure paibabaw agud mapagwa ang nagbara.
Kun nagaisahanon naman ang isa ka persona, sarang ini nga makapangita sang sofa, bangko ukon lamesa kag ibutang ukon iduot sang todo ang iya nga tiyan.
Kun incompletely obstructed naman ang trachea, may yara pa ini sang airway kag dapat nga mahukas ang foreign object sa lawas.// Sarang ini nga madala sa ospital nga may yara sang instrumento nga nagakuha sang foreign object sa lawas.
Suno kay Iturriaga, ang Corazon Locsin Montelibano Memorial Regional Hospital (CLMMRH) lamang ang may yara sang instrumento sa probinsya nga makahukas sang foreign object sa lawas.
Indi naman ini madala sa pag-inom lamang sang tubig bangud ang obstruction sa trachea ang indi basta-basta nga pagkadunlan.
Sa bahin sang mga kabataan, suno sa doktor, kun ini ang matabo, sa sulod sang anum tubtob napulo ka minutos lamang, madulaan na ini sang oxygen kag makatuga sang brain damage.
Gani sa sini nga sitwasyon, dapat may yara sang nakahibalo mag-Heimlich maneuver kag kun makahingagaw, dal-on ini sa CLMMRH.
Nagapanugyan si Dr. Iturriaga nga indi maghambal ukon magkadlaw kun nagakaon bangud ini ang masami nga ginahalinan sang kaangay nga mga insidente.
