Natapos na ang pormal nga investigation report sang Provincial Legal Office sa anay Acting Municipal Treasurer sang Isabela nga si Neneth Escarda angot sa pagkadula sang kwarta kag mga cheke sa iya balay nga nagdangat sa P6.4 million.
Sa interview sang Bombo Radyo kay Provincial Legal Officer Atty. Alberto Nillas, natapos na ang formal investigation sang Provincial Legal Office kag ini ang igapasa na lamang sa opisina ni Governor Eugenio Jose “Bong” Lacson.
Suno kay Nillas, indi pa nila madisclose ang resulta sang imbestigasyon bangud pagahulaton pa ang desisyon sang gobernador nga natalana nga magbalik sa opisina sa Lunes, Abril 17.
Madumduman nga si Escarda ang ginpananaugan sang 60-day preventive suspension sang Pebrero 23 matapos ginpapanaugan sang show cause order.
Ginpaidalom sa formal charge sa kaso administratibo si Escarda nga nalakipan sang serious dishonesty, grave misconduct kag malversation of public funds.
Samtang, magafile naman sang kaso kriminal ang local government unit sang Isabela batok kay Escarda.
Suno kay Nillas, sa masunod nga semana pa mahibaluan kun ano ang mangin pamatpat sang gobernador tuhoy diri.
