Yara sa kustodiya sang Bacolod Police Station 3 ang driver sang Mitsubishi Fuso Fighter Truck nga naglapak sa 32 anyos nga lalaki, kahapon sa Barangay Banago,syudad sang Bacolod.
Ang biktima ang ginkilala nga si John Patrick Biantan, residente sang Barangay Zone 7, Talisay City, samtang ang driver naman sang truck amo si Ramil Saltillo.
Sa interview sang Bombo Radyo kay Police Staff Sergeant Richard Demala, traffic investigator sang Bacolod Police Station 3, gilayon sini nga ginpadulongan ang area sang insidente kag nakita sini nga yara sa idalom sang truck ang biktima.
Yara man didto ang Talisay Disaster Risk Reduction and Management Office (CDRRMO) nga naghingagaw tsekyar sa biktima apang wala na ini sang kabuhi.
Suno kay Demala, naghinali liko ang truck apang bangod sa madasig ang dalagan sang motorsiklo, ini ang nakabunggo sa truck kag nalapakan.
Dugang pa ni Demala, sala ang pagliko sang truck gani nagluntad ang insidente.
Sa karun nakahold ang truck samtang naka-detain naman ang driver.
Samtang, sa interview sang Bombo Radyo sa driver sang truck nga si Ramil Saltillo, mapa-ariya kuntani ini sang karga nga mga botilya apang bangod indi pa ini makasulod sa ariyahan nga lugar, gani nagdiritso ini para mag-uturn.
Nakibot na lamang ang driver sang may naglagapok sa kilid sang iya truck, apisar nga santo diri clear ang dalanon sang siya ang nagliko.
Dugang pa niya, wala siya sang may nabatian nga busina.
Nagpangayo ini sang pasaylo sa pamilya sang biktima bangod indi man sini hungod kay aksidente man ang natabo.
Suno pa diri, siya mismo ang halos indi man makabaton nga siya ang nakapatay sang tawo.
Paathag ni Saltillo, nga siya ang malawig na nga driver kag ini pa lamang ang una nga beses nga siya nag-aksidente sa dalanon.
