Nagpanugyan ang pinuno sang Environmental Sanitation Division sa Bacolod City Health Office sa pumuluyo nga maghalong ilabi na nga madamo sa gihapon ang reported cases sang Dengue, Hand Foot Mouth Disease, Leptospirosis kag Cholera.
Sa interview sang Bombo Radyo kay Dr Grace Tan nagdangat na sa 121 ang kaso sang Dengue kun sa diin isa diri ang napatay.
Masami nga nagaka-apektuhan sang dengue ang mga naga-edad sang isa tubtob pulo ka tuig.
Pulo ka barangay ang narecord nga may madamo nga kaso sang dengue nga ginalakipan sang Barangay Mansilingan, Granada, Pahanocoy, Estefania, Cabug, Tangub, Vista Alegre, Taculing, Mandalagan, kag Singcang-airport.
Sa kaso naman sang cholera, 26 ang suspected cases kag tatlo ang kumpirmado gikan sa tatlo ka barangay nga ginalakipan sang Barangay Estefania, Alijis kag Mandalagan.
Sa kaso sang Hand Foot and Mouth Disease, nagdangat sa 172 ang nareport nga suspected cases.
Ang mga barangay nga may pinakadamo nga kaso sang Hand Foot Mouth Disease ang ginalakipan sang Barangay Villamonte, Handumanan, Taculing, Vista Alegre, Estefania, Singcang, Alijis, Bata, Mandalagan, Mansilingan, Tangub, Banago, Pahanocoy, Sum-ag, Punta taytay kag Barangay 4.
Ginpanugyan ni Tan nga ireport ang mga kaso agud nga makuha ang husto nga status sang siyudad para mahatagan sang husto nga tikang ang pagtapna sini.
