Wala na napunggan sang isa ka Bacolodnon ang pagtulo sang iya luha sang nakita nga nalakip ang iya pangalan sa mga nakapasar sa board exam.
Sa interview sang Bombo Radyo kay Atty Victoria Veronica Azurin, samtang nagahulat ini sang result wala ini untat nga nagbalik-balik sang lakat bangod sa kakulba, kag sang ginpagwa na sang Korte Suprema ang lista sang Bar Exam passers, napauntat si Azurin sang makadali kag gilayon nga naghibi bangod sa kalipay.
Si Azurin nag-graduate sa kurso nag Bachelor of Science in Accounting Technology.
Bangod nga luyag sini mangin isa ka abogada nag-eskwela ini sa University of St La Salle College of Law kag pagkagraduate sini nagreview si Azurin para magkuha sang bar exam.
Suno diri, nangin mabudlay para sa iya ang pagreview ilabi na nga malayo ini sa iya pamilya.
Nagatrabaho man ini sa isa ka private law firm kun sa diin nahasa pa gid ini.
Nangin inspirasyon man ni Azurin ang tiyo sini nga isa ka abogado, nga nagpadalom sa iya interes nga magsulod kag mahangkat ang kaugalingon sa law industry.
Mensahe ni Azurin nga isa sa mga epektibo nga pamaagi sa pagpadayon amo ang pagbaton sa personal nga balatyagon apisar pa nga ini ang negatibo.
