Wala na nasalbar sang ila kaingod ang iloy nga isa ka person with disability kag ang bata sini nga babayi matapos matrap sa nasunog nila nga balay sa 6th Road, Purok Bayanihan, Barangay Taculing, Bacolod City kaina sang aga.
Sa interview sang Bombo Radyo kay Punong Barangay Lady Glez Gonzales-Pallen, nagikan ang sunog sa balay ni Priscila Losaria, alas-8:30 sang aga.
Bangod nga human sa light materials ang mga balay kag nagadikit-dikit, madasig ang paglaton sang kalayo sa balay sang iya hinablos nga si Mingel Itchon, 35-anyos, isa ka stroke victim.
Bangod nga nabudlayan na ini maglakat, wala na ini nakagwa sa ila balay kag napatay kaupod ang iya apat ka tuig nga bata nga si Ariana Itchon.
Suno sa mga residente, ila pa nabatian ang singgit sang mag-iloy apang wala na sang mga ini natabangan bangod nga nagdako na ang kalayo.
Naretrieve ang bangkay sang mga biktima malapit sa peertahan sang ila balay kag dingding nga semento ang yara sa ulot sang duha.
Lima ka balay ang gintupok sang kalayo samtang isa naman ang partially burned.
Nagdangat sa anum ka pamilya ukon 36 ka indibidwal ang naapektohan sang sunog.
Samtang, gilayon man nga nagpadulong sa lugar si Bacolod Vice Mayor City El Cid Familiran nga nagapuyo sa 2nd road kag malapit gid lamang sa 6th road kun sa diin nagluntad ang sunog.
Suno diri, mas dako ang nahalitan kun ang sunog natabo sang kaagahon ukon kagab-ihon.
Apang, ginkasubo man sini sa gihapon ang natabo sa mag-iloy.
Suhestyon sini sa mga biktima sang sunog nga mag-avail sa pabahay program kag sila ang makakuha sang assistance gikan sa gobyerno.
Sa karun, ang punong barangay ang magatrabaho nga magpatukod sang temporaryo nga shelter para sa mga nasunogan. SAMTANG…Tuman ang kasakit nga nabatyagan sang kaupod ni Mingel Itchon sa simbahan sang nahibaluan ang pagkapatay sang mag-iloy.
Sa interview sang Bombo Radyo kay Karen Valencia, aktibo nga nagapartisipar sa simbahan si Mingel nga suno diri, sila na nag ginkabig nila nga pamilya.
Dugang pa niya, masami pa nga nagatinir ang pinakamagulang nga bata ni Mingel sa ila.
Kag kahapon gid lamang sang ini nagpadulong pa sa ila nga simbahan apisar nga nabudlayan na ini maglakat bangod nga naka-agi na ini stroke.
Una nga nagsugod ang sunog sa balay ni Priscila Losaria nga tiya man ni Mingel apang, madasig ang paglakat sang kalayo gani wala na natabangan ang mag-iloy.
Sa pagakahibalo ni Valencia, mahimo pa ni Mingel maggwa sa ila nga balay apang nagbalik ini sa sulod para kuhaon ang tatlo ka tuig sini nga bata nga si Ariana Itchon, kag amo na nag na-trap sa sulod ang mag-iloy.
Samtang, wala untat ang hibi sang tiya ni Mingel samtang ginahulat nga makuha ang bangkay sang iya hinablos kag bata sini.
Suno diri, madamo man sila nga naga-istar sa balay apang bangod nga may trabaho duha lang gid sanday Mingel kag ang tatlo ka tuig sini nga bata ang nabilin didto.
Wala sadtong pagkasunog ang tiya sang biktima nga iya na lamang na -abtan nga natupok na sang kalayo ang balay sang iya hinablos.
