Ginahulat nalang sang pamunuan sang Bacolod City Police Office ang resulta sang ginpatigayon nga random drug test sa mga pila ka mga police personnel kahapon kalakip na ang mga station commanders sang napulo ka police stations sa syudad.
Sa interview sang Bombo Radyo Bacolod kay Police Col. Noel Aliño, acting city director sang BCPO, ginpatawag sini kahapon sang aga ang tanan nga mga station commanders kag pila ka mga police personnel agud nga ipaidalom sa random drug test.
Suno kay Aliño, ang surprise drug test ang ginpatigayon agud nga mapamatud-an nga ang mga kapulisan sa syudad sang Bacolod nga indi imbulbado sa mga iligal nga aktibidad kaangay sang illegal nga druga.
Suno diri, sa tion nga drug cleared ang mga personnel dako ini nga bentaha para sa mga kapulisan.
Nahibaluan nga si Aliño ang nagpungko sang Martes, bulos sa magaretiro na nga si Police Col. Thomas Joseph Martir.
