Patay ang isa ka katapo sang New People’s Army samtang isa naman ka mga suldado ang napilasan sa engkwentro nga nagluntad sa tunga sang 79th Infantry Battalion sang Philippine Army kag New People’s Army sa bahin sang Barangay Libertad, syudad sang Escalante, Negros Occidental kahapon sang aga.
Sa interview sang Bombo Radyo Bacolod kay Lt. Col. J-Jay Javines, commander sang 79th Infantry Battalion sang Philippine Army, nagluntad ang engkwentro pasado alas 10:00 ang takna sang aga kahapon sa nabukid nga bahin sang Sitio Taburdok, Barangay Libertad, Escalante City.
Suno kay Javines, nagdugay sang 30 minutos ang pagbayluhanay sang lupok sa magtimbang nga bahin.
Suno diri, duha ka separado nga engkwentro ang natabo kahapon sa pareho nga lugar sa tunga sang tropa sang gobyerno kag rebelde nga grupo.
Wala pa matumod ang identity sang rebelde nga napatay sa engkwentro samtang ang suldado naman nga napilasan ang yara na sa maayo nga kahimtangan matapos nga mahatagan sang nagakaigo nga pagbulong.
Ginpahayag ni Javines nga grupo ni Arnel Tapang ang nakaengkwentro sang 79th IB.
Madumduman nga si Tapang ang isa ka rebelde nga ginapangita sang mga otoridad bangud sa madamo nga kaso kag warrant of arrest kag ini ang may patong sa ulo nga P900,000.
Nakuha sa encounter site amo ang isa ka M14 Rifle, tatlo ka (3) rifle grenades, tatlo (3) 40mm High Explosives Grenade kag personal nga mga gamit sang mga rebelde.
Nagapadayon sa karun ang ginapatigayon nga hot pursuit operation sang militar sa mga nagpalagyo nga mga rebelde.
Patay man ang isa ka ginaalegar miyembro sang New People’s Army sa engkwentro batok sa 94th Infantry Battalion sang Philippine Army sa Sito Cabiti, Brgy Santol, Binalbagan, Negros Occidental kahapon sang kaagahon.
