Nakilal-an na ang miyembro sang New People’s Army nga napatay sa engkwentro batok sa 94th Infantry Battalion sang Philippine Army sa Sito Cabiti, Brgy Santol, Binalbagan, Negros Occidental sang Huwebes sang kaagahon.
Madumduman nga tatlo ka asod-asod nga engkwentro ang nagluntad sang Huwebes batok sa isa lamang ka grupo sang mga rebelde.
Suno kay Edralin, ang una nga engkwentro ang natabo alas 2:32 sang kaagahon sa tunga sang 62nd Infantry Battalion sa Barangay Camangcamang, banwa sang Isabela kag nagdugay sang lima tubtob pito ka minutos.
Pagka-alas 2:45 sang kaagahon, liwat nga nagbayluhanay sang atake ang militar kag mga rebelde sa kaangay lamang nga area.
Ginabanta 15 ka mga NPA ang naka-engkwentro sang mga militar.
Pasado alas 4:00 sang kaagahon, naglab-ot na sa boundary sang Isabela kag Binalbagan ang mga rebelde kag ila naka-engkwentro ang mga katapo sang 94th Infantry Battalion.
Suno kay Edralin, diri narecover ang isa ka bangkay sang isa ka lalaki nga NPA.
Samtang, duha naman ka mga suldado ang napilasan.
Sa interview sang Bombo Radyo kay Brigadier General Orlando Edralin, commander sang 303rd Infantry Brigade sang Philippine Army, ang napatay nga rebelde amu si Rogelio Posadas alias “Putin,” isa ka top leader sang Komiteng Rehiyon- Negros, Cebu, Bohol, Siquijor (KR-NCBS) kag secretary sang Unified Regional Committee para sa isla sang Negros, Cebu, Bohol, kag Siquijor.
Siya ang gin-identify sang mga anay kaupdanan sini sa hublag nga nagbalik na sa sabak sang gobyerno.
Sa karun ang iya bangkay ang yara sa Soledad Funeral Homes sa banwa sang Binalbagan.
Suno kay Edralin, wala pa sang may nagclaim sang bangkay ni Posadas gani nagapanawagan ini sa mga himata nga ini ang iclaim agud mahatagan sang nagakaigo nga paglubong.
