Ginpahayag sang chairman sang Committee on Energy sa Sangguniang Panlungsod nga nagpasulod sang position paper ang Power Watch Negros tuhoy sa Joint Venture Agreement sa tunga sang Central Negros Electric Cooperative, Inc. (CENECO) kag MORE Power Corporation.
Suno kay Councilor Kalaw Puentevella, wala pa sini nabasa ang content sang position paper apang pabor kag positibo ang paglantaw sang mga ini sa JVA.
Suno sa iya, bag-o ini nga balita bangud ang grupo ang tuman ka kritikal tuhoy sa partnership kag JVA.
Wala pa sini makit-an ang kabug-usan nga content sang position paper apang pabor ang Power Watch kag naga-upod nga dapat mangin bukas sa paghinun-anon ang CENECO sa More Power Corporation tuhoy sa proposal.
Suno kay Puentevella, ini ang pagatun-an sang komitiba sang maayo bangud suno sa iya, mabudlay ang magkomento kag maghatag sang sentimento kun wala pa natun-an ang kabug-usan nga kaundan sang proposal.
Bukas naman ang mga opisyal sa pagtuon sini ilabi na kun para sa kaayuhan sang mga stakeholders kag ciudad sang Bacolod.
Naapresyar man sini ang pagpalab-ot sang pamunuan sang CENECO sang nasambit nga proposal sa konseho.
