Mahimo nga ikonsiderar ni Negros Oriental 3rd District Representative Arnolfo “Arnie” Teves Jr. ang pagbalik sa Pilipinas kun makita nga may tupong nga pagtrato nga igahatag sa iya.
Suno kay Congressman Teves, indi insakto ang termino nga “Surrender Feeler” nga gin-usar ni Justice Secretary Jesus Crispin C. Remulla, kun sa diin iya ginkwestyon kun paano mag-surrender ang isa ka indibidwal kun wala sang sala.
Pahayag ni Teves, kun makitaan sini nga may semblance of fairness, mahimo nga ikonsiderar niya ang pagpauli sa pungsod apang kun wala sang tupong nga pagtrato, dako ang pagpati sini nga yara sa delikado ang iya kabuhi.
Paathag ni Teves, una dapat sa tanan ang ebidensya antes ang katapusan nga konklusyon, apang sa iya nga sitwasyon, siya ang una ang gindagdagan sang konklusyon kag amat-amat nga ginpasudlan sang ebidensya.
Ginhalimbawa sini nga ang konklusyon amo nga siya ang gin-angot sa pagpatay kay late Negros Oriental governor Roel Degamo kag ini gintumpukan sang mga ebidensya nga mapasulod sa konklusyon nga siya ang mastermind.
