Nag-issue ang Department of Education (DepEd) sang memorandum nga sarang na nga makasuspende ang mga buluthuan sang face-to-face classes kag makashift sa modular distance learning kun tuman ka init sang tiyempo nga maka-apekto sang ikaayong lawas sang mga estudyante kag personnel sang isa ka buluthuan.
Sa interview sang Bombo Radyo kay Leo Ceralbo, principal sang Mandalagan Elementary School, sila ang ginhatagan sang otoridad nga magsuspende sang klase kun malain ang tiyempo ukon nakarisgo ang ikaayong lawas sang kabataan.
Suno diri, magapatigayon ini sang meeting kaupod ang mga manunudlo kag mga ginikanan kag kuhaon ang ila suhestyon kun ano ang mas maayo nga buhaton sa sistema sang klase nga apektado sang tuman ka init.
Pahayag ni Ceralbo, nalakip sa ila nga plano nga I-adjust ang schedule sang klase kaangay nga maga-uimpisa ini alas-6:00 tubtob alas-10:00 sang aga kag sa hapon naman magasugod ang klase alas-3:00 tubtob alas-5:00, isa man sa ginalantaw sini amo nga sa magapatigayon sang klase sa major subjects sa aga kag modular distance learning kun hapon.
Nagaplano man ini nga hiwaton ang flag ceremony alas-6:45 sa aga samtang indi pa tuman ka init kag indi mabulad sa init ang mga estudyante.
Samtang, naaprubahan naman sang division superintendent nga indi required sa mga manunudlo ang magsuksok sang uniporme kag wala anay sang outdoor activities ang mga kabataan.
Mensahe ni Ceralbo sa mga ginikanan nga pabalonan sang payong kag tubig ang mga estudyante antes magpadulong sa eskwelahan.
