Ginasuportahan sang chairman sang committee on health and sanitation sa Sangguniang Panlungsod sang syudad sang Bacolod ang tikang sang Department of Education nga tun-an kag ipatuman ang blended learning sa mga estudyante kun tuman ka init ang panahon kun sa diin madamo na sang mga kabataan ang ginreport ang nasunggo ukon nagadugo ang ilong.
Sa interview sang Bombo Radyo Bacolod kay Councilor Claudio Jesus Raymundo “Kalaw” Puentevella, suportado sini ang pagpatigayon sang pagtuon sang Department of Education sa pagpatigayon sang blended learning bangud sa extreme weather condition bangud delikado sa mga kabataan ang tuman ka init nga panahon.
Suno diri, sa tion nga matam-an ka init ang lawas sang tawo nagadugo ang ilong sini ukon nagakasunggo.
Nagpanugyan man ini sa mga ginikanan nga pabalunan sang payong kag tubig ang mga kabataan agud nga may protection gikan sa tuman kainit nga panahon.
Apang ginaduso man sini nga mahimuan sang tikang nga matapos na ang ang klase subong nga tuig kag mabalik sa nakaandan nga school calendar ang klase sang mga kabataan bangud indi man na ini normal nga summer heat ang nabatyagan sa karun.
Madumduman nga nagduso man si Puentevella sang resolution sa Sangguniang Panlungsod angot sa pagpaandam sa mga pumuluyo batok sa heat stroke tuga sang tuman ka init nga panahon.
Samtang duha ka semana ang nakaligad nagduso man ini sang resolution nga nagaengganyo sa alkalde sang syudad sang Bacolod nga mahatagan sang bulig kag maproteksyunan ang mga frontliners kaangay sang mga traffic enforcers nga nagabulad sa initan sa tion sang ila trabaho.
