Ginpangunahan sang regional director sang Department of Education Regional Office 6 ang opisyal nga pagbukas sang Western Visayas Regional Athletic Association (WVRAA) Meet 2023 sa probinsya sang Aklan kahapon sang hapon.
Ginpakilala paagi sa isa kaparada ang mga atleta kag delegado nagikan sa anum ka mga probinsya sa Rehiyon 6.
Nangin madinuagon ang opening sang WVRAA bangud sa ila ginsuksok nga mga bayo kag banners.
Ginwelcome ni Dr. Ramir Uytico ang mga delegado nga nagikan sa nagkalain-lain nga probinsya sa Western Visayas.
Gin-acknowledge man sini ang pagpadulong ni Negros Occidental Governor Eugenio Jose “Bong” Lacson sa probinsya sang Aklan apisar sang kalayo sang ginbiyahe sini.
Makita man kahapon ang malipayon nga nawong ni Governor Lacson samtang nagaistorya sa mga coaches, trainors kag mga atleta sang Negros Occidental.
Ang Negros Occidental ang may yara sang pinakamadamo nga delegado sa WVRAA.
Nagpasalamat man si Uytico nga nadayon na ang pagpatigayon sang WVRAA 2023 kag ang mga magadaog diri ang magarepresentar sang rehiyon sa Palarong Pambansa 2023 sa bulan sang Hulyo.
Ginpasalamatan man sini ang mga local government units nga nagbulig kag nagsuporta sa mga atleta.
Nagpanawagan man ini sang pagpangamuyo nga mangin maayo ang pag-umpisa tubtob matapos ang pagpatigayon sang WVRAA 2023.
