11 na ang bulawan nga medalya sang Negros Occidental sa Elementary category, 15 sa Secondary level kag siyam sa Paragames sa nagapadayon nga Western Visayas Regional Athletic Association (WVRAA) Meet 2023 sa probinsya sang Aklan as of 12:00 noon.
Ang probinsya ang may 15 naman ka mga gold sa Elementary category, 14 sa Secondary kag 21 sa Paragames.
May yara sang apat ka bronze ang Negros Occidental sa Elementary category, 20 sa Secondary kag anum sa Paragames.
Sa report ni WVRAA 2023 Correspondent Bombo Tony Oquindo, nalutos sang Negros Occidental ang Aklan sa softball kaina sang aga sa score nga 12-0.
Samtang, ginpakigbahin man sini ang insidente kagab-i sa kitchen sang Negros Occidental kun sa diin may yara sang nanghaboy sa bato.
Suno kay Oquindo, alas 7:30 tubtob alas 8:00 sang gab-i sang may nagtupa nga bato sa building nga ginahamtangan sang delegates sang probinsya kag naglab-ot ini sa ginakan-an.
Napa-blotter na ang insidente kag sa karun ginahibalo pa kun sin-o ang suspetsado.
Samtang, 15 ka mga van, duha ka buses sang local government unit kag tatlo ka salakyan nga wala aircon agud sudlan sang gamit ang nakastandby sa area.
Suno kay Danilo Esmane, transportation committee chairman, tuman kalayo sang playing venue sa headquarters.
Suno sa iya, alas 6:00 sang aga nagasugod ang athletics gani alas 5:00 sang kaagahon nagahalin na ang buses bangud nagadangat sa 20 tubtob 40 ka minutos ang kalawigon sang byahe.
Samtang, Yara na sa 90 porsyento ang kadalag-an sang Negros Occidental santo sa anunsyo sang camp director matapos ang ikaduha nga adlaw sang Western Visayas Regional Athletic Association (WVRAA) Meet 2023 kahapon.
Suno kay WVRAA 2023 Bombo Correspondent Antonio Oquindo, gin-ugtasan sang madamo nga mga tumalambong sa pahampang ang nagluntad nga brown out halin ala-1:30 kahapon sang hapon tubtob alas-6:00 sang gab-i.
Apang wala ini nakapugong sa pahampang kun sa diin sa 2nd day sang WVRAA Meet 2023, ang Negros Occidental ang nakatipon na sang kabug-usan nga 24 ka gold, 25 ka silver kag 17 ka bronze medal ukon kabug-usan nga 30 ka medalya gikan sa elementary division kag 36 ka medalya gikan sa secondary.
Ini ang ginsundan naman sang Iloilo ang nakahakot naman sang 27 ka medalya sa elementary kag 34 ka medalya sa secondary.
Apang ginakasubo ni Oquindo nga sang siya ang nagaserbe nga coach kag tubtob nga nagretiro, karun lang ini nakabati nga nalutos ang baseball elementary sang Negros Occidental batok sa Aklan sa score nga 6-3.
Apang paathag sini nga round robin ang hampang kag may tyansa pa nga makabawi ang Negros Occidental.// Sa pihak nga bahin, nalutos naman sang secondary football team sang Negros Occidental ang Iloilo nga nakilala na sa patag sang football sa score nga 1-0 samtang ang elementary ang nakadaog naman sang 3-1 batok sa Capiz.
Suno kay Oquindo, matapos sang WVRAA Meet 2023, una nga beses man nga magapatigayon sang Pre-Palaro sa Cebu sa bulan sang Hunyo.
Ang Pre-Palaro sa Cebu ang pagahampangan sang mga makasulod sa top 2 nga team sa ball games gikan sa Region 6, 7, 8 kag 9.
Ini ang patigayunon antes ang Palarong Pambansa sa Marikina City sa Hulyo.
Sa pihak nga bahin, kun indi magabag-o ang school calendar, ginalantaw na ni Oquindo nga magapabilin ang schedule sang WVRAA Meet sa summer season samtang ang Palarong Pambansa naman ang patigayunon sa tion na sang tig-ululan sunod sa international pattern.
