Ginalauman nga magaabot sa Bacolod City ang isa ka sample unit sang e-jeepney nagikan sa China sa masunod nga semana.
Madumduman nga may ginpermahan nga memorandum of understandy ang ciudad kag Chinese company nga Jiangsu Fengchuen New Energy Power Technology tuhoy sa pagtkod ang manufacturing kag assembly plant sa Bacolod.
Sa interview sang Bombo Radyo kay City Administrator Atty. Pacifico Maghari III, kahapon kuntani magaabot ang e-jeepney apang bangud sa kakulang sa mga papeles kag dokumento, ini ang ginalauman nga makalab-ot sa ciudad sa masunod nga semana.
Sa bulan sang Mayo kag Hunyo, dugang nga duha ka units sang e-jeepney ang magaabot sa ciudad.
Suno kay Maghari, ang maga-operate sang magaabot nga unit amo ang City Mayor’s Office kag ini ang igaparehistro sa Land Transportation Office agud nga maggamit.
Pagatestingan ang iya road worthiness, kun komportable ang publiko kag kun ano ini kagasto.
Ini ang experimental kag igakumparar ang konsumo sang e-vehicle sa fossil fuel kag kun hakog sa charging station ukon krudo.
Suno sa city administrator, ini ang kabahin sang modernization program bangud tinutuyo sang ciudad nga mangin isa ka smart city.
Mangin kabahin man ini sang ila marketing approach kag kun makumbinse ang mga operators nga kuhaon ini bilang service, magakuha anay sang orders kag magasunod ang manufacturing.
Samtang, Gin-evaluate pa sang Bacolod City Government kun pila nga mga units sang traditional jeepneys ang sarang nga makabyahe sa ciudad.
Sa interview sang Bombo Radyo kay City Administrator Atty. Pacifico Maghari III, ila ginbalikan ang data sang 2019 kun pila ka mga public utility jeepneys ang nagabyahe sa Bacolod kag nahibaluan nga sadto, may yara sang 3,100 ka mga jeep nga nagabyahe apang 2,900 lamang ang rehistrado.
Suno diri, nagpangayo man si Mayor Alfredo Benitez sang data kun pila ka units ang nagabyahe kada routa.
Suno sa iya, bangud nga may yara sang modernized jeepneys kag samtang nagapadulong ang ciudad sa modernization, ginahibalo sang ciudad kun pila lamang ka traditional jeepneys ang pwede nga ma-issuehan sang provisional authority.
Suno sa city administrator, kun magsululubra ang salakyan sa dalan, indi na maka-income ang modernized kasubong man ang traditional jeepneys.
Gani sa karun, ila pa ginahibalo kun ano ang exact nga formula agud mahibaluan kun pila ka units sang traditional jeepneys ang kinahanglanon sang Bacolod.
