Isa ka miyembro sang New People’s Army ang napatay kag isa ang nadakpan sa engkwentro batok sa 62nd Infantry Battalion sang Philippine Army sa Sitio Malatanglad, Barangay Budlasan, Canlaon City, Negros Oriental, alas-4:40 kahapon sang hapon.
Sa interview sang Bombo Radyo kay Lt. Col. William Pesase, commander sang 62nd Infantry Battalion sang Philippine Army, nagdugay sang kapin lima ka minutos ang engkwentro sa tunga sang mga militar kag Central Negros 1.
Suno kay Pesase, lima ka mga miyembro sang NPA ang ila naengkwentro kun sa diin isa ang napatay.
Wala naman sang may nasamaran sa tropa sang gobyerno.
Ang rebelde nga nadulaan sang kabuhi ang ginkilala kay Anthony Curson alyas Miguel samtang nadakpan naman sang militar si Leonido Montero alyas Lanie ukon Dindo.
Narecover sa encounter site ang duha ka .45 caliber pistol nga naga-unod sang duha ka mga magazines kag duha ka sling bags.
Si Montero ang gin-aresto paagi sa pagserbe sang warrant of arrest bangud sa kaso nag murder, pagbayolar sa RA 9516, RA 7166 kag RA 10591 nga gin-issue sang Regional Trial Court, 7th Judicial Region, Branch 64, Guihulngan City, Negros Oriental.
Suno kay Pesase, si Montero ang yara sa kustodiya sang kapulisan kag wala sang piyansa ang mga kaso nga ginpasaka batok sa iya.
Ginpanginbulahan naman ni Major General Marion R Sison, the Commander of the Army’s 3rd Infantry (Spearhead) Division ang operasyon sang tropa kag pagresponde sa report sang mga residente nga may presensya sang makawala nga grupo sa lugar.
Nagpanawagan man ini sa mga NPA nga magsungka na kag mag-avail sang programa sang gobyerno.
