Magabutang sang help desk ang Bacolod City Government sa kada ospital sa ciudad nga accredited sang Bacolod City Comprehensive Health Insurance Program (BACCHIP) card.
Suno kay Mayor Alfredo Benitez, nagapaidalum na sa seminar kag training ang mga personnel nga igabutang sa mga help desk sa mga ospital nga accredited sa nasambit nga programa kaangay sang Bacolod Queen of Mercy Hospital, Metro Bacolod and Medical Hospital kag South Bacolod General Hospital.
Suno kay Benitez, sa Lunes, Mayo 1, mangin epektibo ang BACCHIP card gani sa nasambit nga petsa, yara naman ang help desk sa mga ospital.
Suno sa alkalde, indi na kinahanglan sang benepisyaryo nga magpadulong pa sa mga opisina sang gobyerno kundi magarekta na lamang sa accredited hospitals bangud may listahan man sang mga maka-evail didto.
Ang ini nga konsepto suno sa iya ang agud mas mangin mahapos ang access sang mga pumuluyo sa medical attention.
Samtang, ginpahayag naman ni Councilor Kalaw Puentevella, chairman sang Committee on Health and Sanitation sa Sangguniang Panlungsod nga P15,000 ang unod sang BACCHIP card.
Suno kay Puentevella, P15,000 ang balor nga gin-aprubahan sang city council kag sang alkalde apang may mga konsiderasyon man ilabi na kun sobra ang balor nga kinahanglanon sang isa ka benepisyaryo.
