Ginalantaw sang Bacolod City Risk Reduction and Management Office nga high tide kag basura ang rason kun ngaa guplyada nga ginbaha ang pila ka bahin sang Bacolod City matapos magbubo sang makadali ang makusog nga ulan sang Domingo, Abril 30.
Sa interview sang Bombo Radyo kay Bacolod City Risk Reduction and Management Office head Dr. Maria Laarni Pornan, halos adlaw-adlaw ginalimpyuhan sang flood control team ang drainage sa downtown area apang sang Domingo ginbaha ang dalanon.
Suno diri, madamo sang basura nga nagaupod sa ilig sang tubig kag nagatililipon sa dalan rason kun ngaa nagabara ang drainage.
Samtang, sa paglibot sini sa Mambuloc Bridge sa Brgy 12, nakit-an nga nagasaka lang ang tubig apang wala nagailig bangod nga wala sang gwaan.
Dugang pa niya, bangod nga madamo sang basura ang nagatipon sa kilid sang dalan, kag nagdungan sa high tide ang pagbubo sang ulan gani nagresulta sa pagbaha.
