Liwat nga may nakit-an nga nagaka-agnas na nga bangkay nga nakasulod sa sako sa isa ka tamburong sa Economic Highway, Barangay Cabug, Bacolod City alas-5:50 kahapon sang hapon.
Sa interview sang Bombo Radyo Bacolod kay P/Capt Rondyl Tapang, station commander sang Bacolod Police Station 9, sa mandato ni acting Bacolod City Police Office (BCPO) Director P/Col. Noel Aliño, bilang kabahin sa ila nga Integrated Police Deployment Plan (IPDP) ang mga kapulisan ang nagalibot sa syudad kag ginatsekyar ang mga tamburong.
Madumduman nga sang Domingo, duha man ka bangkay ang nasapwan sa tamburong sa Barangay Felisa.
Suno kay Tapang, bangod sa ginpasanyog nga patrolling, natukiban nila ang nagapanimaho nga tamburong gani sila ang naghingyo sang assistance sang Barangay agud nga ini ang mtsekyar.
Nakit-an sa nasambitan nga tamburong ang bangkay nga nasulod sa sako kag yara na sa advance state of decomposition gani indi naman matumod ang gender kag identity sini.
Ang bangkay ang gilayon man nga gintsekyar sang mga katapo sang Scene of the Crime Operation (SOCO) kag ginkuhaan sang DNA sample.
Sa karun ginahulat pa nila ang resulta sang autopsy kag ang ginpatigayon nga DNA testing.
Nagapanawagan naman si Tapang sa mga may namissing nga himata nga magpadulong lamang sa Bacolod Police Station 9.
