Duha ka tuig humalin sang ginpatigayon ang dredging, napuno na naman sang basura ang Mambulok Creek sa Purok Lampirong, Barangay 2, ciudad sang Bacolod kag ini ang ginalantaw nga isa sa mga rason sang pagbaha sa palibot sang SM City sang Domingo sang hapon.
Sa paglibot sang Bombo News Team sa lugar, natubuan na sang hilamon ang Mambulok Creek kag nagabukid ang basura diri gani indi makailig ang tubig.
Sa interview sang Bombo Radyo kay Engr. Abraham Villareal, district engineer sang Bacolod City Engineering District, mahimo nga nag-awas na naman ang Mambulok Creek ukon wala na nagafunction ang drainage sa Palanca, Ferrero kag Rizal Streets.
Bangud sini, nagvolunteer ang DPWH nga magaupod sa survey agud mahibaluan kun ano ang kabangdanan sang baha agud nga mapangitaan sang solusyon.
Pananglitan nga idredge ang Mambulok Creek, 33 ka mga pamalay ang natalana nga kakason nagikan sa lugar kag igasaylo sa relocation site.
Sang tuig 2021, naglimpyo kag nagdalom na ang Mambulok Creek kasunod sang dredging nga ginpatigayon sang city government.
Suno naman sa residente sa Masagana Extension, Purok Lampirong, Barangay 2 nga si Luz Jawod, 63-anyos, nagsugod ini sa pag-istar sa pangpang sang sapa sang tuig 2006.
Ginsapol naman sila sang tinalikdan nga bulan apang wala na sang bakante sa Arao relocation site.
Bangud indi pa sila makasaylo, indi pa makasugod ang dredging operation bisan yara na sa lugar ang backhoe.
Suno diri, ang basura ang nagikan sa babaw sa Barangay 8 kag Barangay 10 bangud ang mga kapehan ang nagahaboy lang sang ila nga basura sa creek.
Panindugan sini, may kaugalingon sila nga basurahan kag wala sila nagahaboy sang basura sa sapa.
Nakahanda naman ini nga magsaylo sa relocation site basta indi lang sila pag-ibutang sa tenement nga pabahay program sang city government kun sa diin madamo nga mga hulot ang yara sa isa ka building nga daw anggid sa condominium bangud madamo sila nga nagaistar diri.
