Nareconnect na ang kuryente sa pila ka mga buluthuan nga nautdan sang connection kahapon bangud wala nakabayad ang ciudad.
Sa interview sang Bombo Radyo Bacolod kay Councilor Al Victor Espino, chairman sang Committee on Education sa Sangguniang Panlungsod, may napulo ka mga public nga eskwelahan nga naapektuhan sang pagpang-utod sang kuryente kahapon kun sa diin walo ang elementary schools kag duha ang high schools.
Gin-athag naman ni Espino na ang elementary lamang ang obliged nga bayaran sang ciudad bangud may yara sang kaugalingon nga Maintenance and Other Operating Expenses ang mga high schools.
Suno diri, nagpatigayon ini sang consolidation meeting sa Central Negros Electric Cooperative (CENECO) agud usisaon kun diin ang deperensya kag iya nakit-an nga lunsay ang ciudad kag ang electric cooperative ang may deficiency bangud sa miscommunication.
Ginremind naman sang konsehal ang CENECO nga ini ang labing una nga kahigayunan nga nautdan ang mga eskwelahan sang kuryente kag wala pa sang abiso.
Suno kay Espino, ang Bacolod City Government ang pinakadako nga kliyente sang electric cooperative apang wala nila ginahatagan sang importansya kag wala man lang ginhambalan nga sila ang madisconnect.
Matapos ang ila paghinun-anon, nakabalik na ang kuryente magluwas lamang sa elementary school sa Singcang Airport kag nagpasalig ang konsehal nga indi na ini matabo liwat.
P19 million ang kabug-usan nga arrears sa ciudad apang suno kay Espino, bwas nga adlaw, may P10 million nga cheke nga ipagwa agud ibayad sa CENECO.
Samtang ginpahayag naman ni Atty. Arnel Lapore, general manager sang CENECO nga sila ang magacoordinate sa Department of Education, Accounting kag iban pa nga relevant offices.
Suno kay Lapore, ila na naspecify ang mga concerned offices nga magabaton, magaproseso sang bill kag magahatag sang update.
Suno sa iya, subong ila na nahibaluan nga may P1.9 million pending for release na samtang may P287 million naman nga arrears ang ciudad nagikan pa sa nagligad nga administrasyon.
Apang suno sa iya, sila ang nagapangita sang pamaagi agud ini ang ma-address kag naghatag man sang commitment ang ciudad.
