Igademolish ang mga balay sa Purok Lampirong, Barangay 2, Bacolod City kun indi magkooperar ang mga pumuluyo sa relocation project sang ciudad.
Sa interview sang Bombo Radyo kay Bacolod City Administrator Atty. Pacifico Maghari, nagmeeting ang Task Force Baha sang Martes kaupod ang Department of Public Works and Highways kag nakasugtan nga ang ahensya kag ang City Engineers Office ang magacoordinate sa pagtukod sang drainage plan sa ciudad agud ma-address ang problema sa pagbaha.
Suno kay Maghari, ang basura nga wala mahimos kag nagaclog sa mga drainage amu ang isa sa rason sang pagbaha sa ciudad.
Ginamanduan naman ang City Legal Office nga istoryahon ang mga pumuluyo malapit sa Mambuloc Creek nga magkooperar sa relocation project bangud indi kun, ini ang igapasaka sa local housing board para sa demolition.
Nagahulat-hulat na lamang ang mga residente sa Purok Lampirong, Barangay 2 nga sila ang makasaylo sang puluy-an kag marelocate bangud sa madasig nga pagsaka sang tubig sa lugar kun nagaulan.
Sa interview sang Bombo Radyo kay Luz Jawod, sang Domingo, nagsaka ang tubig sa lugar kag sila ang ginbaha.// Suno kay Jawod, ini bangud sa mga basura nagikan sa Barangay 9 kag Barangay 10.
Suno diri, sila mismo ang nagahulat-hulat na lamang nga irelocate apang puno kag wala sang lugar para sa ila sa Purok Arao, Vista Alegre.
Suno sa iya, halos tanan sa ila ang indi willing nga mag-istar sa condominium type nga balay bangud sa iya pamilya, pito sila kabilog kag may apat ini ka mga kabataan nga lalaki nga wala pa sang pamilya.
Suno kay Jawod, indi nila masarangan magbayad sang P2,500 kada bulan bangud siya ang senior citizen na kag ang iya mga kabataan ang nagatrabaho bilang construction worker.
Kun indi makabayad sa sulod sang lima tubtob anum ka bulan, sila ang pahalinon sa gihapon kag wala sang kadtuan.
Sa karun sila ang nagahulat pa kun diin sila igarelocate kag handa man ang mga ini nga magkooperar sa ciudad.
Nagapanawagan ini kay Mayor Alfredo Benitez nga sila ang hatagan sang pagtamod bangud tuman na kadamo sang basura sa Mambuloc Creek kag sila ang ginabaha gani nagapangabay ini sang bulig.
Samtang, handa naman ang Punong Barangay sang Barangay 2, Bacolod City nga magbulig sa mga pumuluyo nga nagapuyo malapit sa Mambuloc Creek sa pagproseso sang ila relocation.
Sa interview sang Bombo Radyo kay Punong Barangay Emelda Banguanga, nakapublic hearing na sila sa Mambuloc Creek sang tinalikdan nga tuig kag 12 ang una nga ginpasa para sa relocation apang may nagdugang nga 33.
Nakapatigayon na ang mga ini sang meeting kag nakapadala naman siya sang sulat kay Bacolod City Lone District Congressman Greg Gasataya kag Mayor Alfredo Benitez kun ano ang ila tikang nga himuon agud makasugod na ang mga ini sa paghalin.
Nakighinun-anon man ini sa pila pa ka mga opisyal tuhoy sa basura sa Mambuloc Creek.
Sa karun ginahulat pa ang reaksyon nagikan sa Bacolod Housing Authority kun aprubado ukon indi ang mga luyag magparelocate amu pagpasa sang mga ini sang requirements.
