Bangud indi man mahusayan ang sentimyento sang mga jeepney operators kag drivers nga nagtipon sa atubang sang Bacolod City Government Center halin kaina sang aga, gintipon nalang sang chairperson sang committee on transportation sa Sangguniang Panlungsod ang ila nga reklamo agud nga mapalab-ot sa concerned agency.
Kaina sang udto, ginsulay ni Councilor Al Victor Espino ang init agud paathagan ang mga drivers nga nagaprotesta sa gwa sang Bacolod City Government Center.
Suno diri, may endorsement na ang city government para sa masobra isa ka libo nga may pending application para sa provisional authority.
Ginpamilit ni Espino nga lunsay lang alegasyon ang pahayag sang mga driver kag operator nga indi mag-issue ang LTFRB sang prangkisa bangud indi magpasugot ang local government unit.
Ginpanindugan sini nga dapat makapasar pa ang jeep sa requirements sang Land Transportation Office antes sila makarenew sang prangkisa bangud kinahanglan nga rehistrado ini.
Bangud madamo man sang sentimyento ang mga operators kag drivers angot sa PA, ginpanindugan ni Espino nga indi ini masolbar sa paglalisay.
Suno kay Espino, magakadto ini sa regional office sang LTFRB agud usisaon kun ano ang matuod nga sitwasyon.
Suno sa konsehal, wala sang kaangtanan ang Bacolod City government sa denial sang ila nga provisional authority bangud ang Land Transportation Franchising and Regulatory Board ang nagahatag sang prangkisa. SAMTANG…Ginpahayag naman ni Bacolod City Mayor Alfredo Benitez nga nagkaproblema sa original arrangement agud nga mahatagan sang provisional authority ang traditional jeepneys bangud nagpungko ang bag-o nga director sang Land Transportation Franchising and Regulatory Board Region 6.
Bangud sini, nagtawag ang alkalde sa secretary sang Department of Transportation agud magpahibalo.
Indi maintindihan sang alkalde nga may pagbag-o naman sa arrangement kag nagbalik sa zero nga nahitso na kuntani ini.
Nagpasalig naman ang DOTR secretary nga tawgan niya ang board agud mahibaluan kun ano ang ila nga himuon.
Sa nauna nga arrangement nga nakasugtan, ang city government ang magaendorse sang applications para sa provisional authority sang traditional jeepneys agud nga mapun-an ang kulang nga modernized jeepneys nga nagabyahe sa ciudad.
Kun Local Public Transport Route Plan naman ang concern sang mga drivers kag operators nga luyag nila ipakakas, ginpahayag ni Benitez nga yara na ini sa Sangguniang Panlungsod bagud sila ang nag-approve sini.
