Nagahingyo sang koordinasyon ang Bacolod City Police Station sa mga Telecommunications Company, nga sila ang buligan sa ginpasanyog nga kampanya sa pagpangdakop sang mga kawatan sang kable sang kuryente sa syudad sang Bacolod.
Pahayag ni acting Bacolod City Police Office (BCPO) director P/Col. Noel Aliño, nakighinun-anon na ini sang Mayo 4 kaupod sa mga telco providers sa Bacolod City Government Center (BCGC).
Ginprangka naman sini nga indi lamang problema sang law enforcers ang kinawatay sang kable sang kuryente gani sila ang nagahingyo sa mga telco providers nga magbulig.
Dugang pa ni Aliño nga kun sila ang may madakpan, sa pagpatigayon sang interrogation, target nila nga matumod kun sin-o ang ugat, ang nagsugo, nagabakal, nagakinahanglan kag kun ano ang purpose ukon motibo.
Paandam naman sang acting BCPO director nga kun ini mismo ang makadakop sa mga kawatan, siya mismo ang magahigot sang cable wire sa leog sang mga ini.
Suno diri, derektiba ni Bacolod City Mayor Alfredo “Albee” Benitez ang pagpasanyog sang kampanya sa pagdakop sang mga cable theft bangod ini ang naga-apekto sa madamo nga negosyo, estudyante kag kumunikasyon.
Sang Sabado sang gab-i, masobra balor P35,000 nga cable wire ang narecover gikan sa kawatan nga ginkilala nga si Romel Ellena sa Bangga Cegasco, Araneta Street, Barangay Pahanocoy, Bacolod City.
Paathag ni Aliño nga sa tactical interrogation, tumuron nila kun sin-o ang amo sang suspetsado, diin ginadala nga junkshop kag kun sin-o ang nagabakal.
