Pilason ang tatlo ka persona matapos nagbunggo ang isa ka Toyota Rush sa nagaparada nga tricycle sa Dalan Araneta, nasakupan sang Purok Medalla Milagrosa, Barangay Sum-ag, ciudad sang Bacolod kahapon sang hapon.
Pilas sa ulo ang gin-agom ni Remo Yulo, 60-anyos, sang Purok Medalla Milagrosa, Barangay Sum-ag, nga nagapungko sa driver side sang nagapundo nga tricycle samtang pilason man sanday Brigida Delicano, 58-anyos kag Ma. Lucia Mata, 50-anyos, pareho nga pumuluyo sang Purok San Benito, Barangay Sum-ag, nga natabuan nga nagatindog kag nagaistorya sa tupad sang tricycle.
Gindala man sa ospital ang driver sang pribado nga salakyan nga si Christopher Jacildo, 58-anyos, pumuluyo sang Regent Pearl Homes Subdivision sa Barangay Alijis, matapos nagtaas ang blood pressure.
Sa interview sang Bombo Radyo Bacolod kay PSSgt Roland Abong, traffic investigator sang Bacolod Police Station 9, nagikan sa sur kag padulong sa norte kag papauli na si Jacildo sang natabo ang aksidente.
Ginapatihan nadulaan ini sang kontrol sa salakyan.
Pareho nga wasak ang SUV kag tricycle sa natabo nga aksidente.
Nagpanugyan man si Abong sa tanan nga mga motorista nga maghalong sa tion nga nagabiyahe agud malikawan ang insidente.
