Priso ang isa ka Grade 11 student sa Rafael B. Lacson Memorial High School sa Felipe Lacson Street, Brgy. 12, Talisay City, matapos nakuhaan sang marijuana sa sulod mismo sang school campus kaina sang aga.
Sa interview sang Bombo Radyo kay Police Lt. Abegael Donasco, spokesperson sang Talisay City Police Station, nagpatigayon sang surprise inspection sa mga estudyante ang mga manunudlo, security guard, kag Citizens Crime Watch nga makabig force multiplier sa ciudad sang Talisay sang nakuha sa bulsa sang 18-anyos nga si Dennis Casiple ang dried marijuana leaves nga nasulod sa scratch nga yelllow pad paper.
Nakuha pa gid sa possession ni Casiple ang isa ka improvised pipe.
Bangud sini, nagtawag ang mga manunudlo sa Talisay City Police Station agud nga maaresto si Casiple nga residente sang Sugar Valley, Brgy. Efegenio, Talisay City.
Si Casiple ang kasuhan sang violation sang Section 11 kag Section 12 sang Comprehensive Dangerous Drugs Act of 2002.
Suno kay Donasco, ginpasanyog pa gid ang inspection sa mga estudyante sa Rafael B. Lacson Memorial High School kasunod sang pagkarecover sang granada sa isa man ka estudyante tinalikdan nga binulan.
Sa karon, yara sa kustodiya sang Talisay City Police Station ang estudyante kag natalana nga pasakaan sang kaso.
Padayon naman ang kampanya sang Talisay City Police Station batok sa illegal nga druga paagi sa pagpatigayon sang symposium.
