Kabahin sa programa sang Negros Occidental Police Provincial Office (NOCPPO) ang Resistance Education against Illegal Drugs ukon ang pag-edukar sa mga estudyante agud malikaw sa temptasyon sang illegal nga druga.
Madumduman sang Abril 4, 2023 nakuhaan sang granada kag isa ka sachet sang suspected marijuana ang 21 anyos nga Grade 10 student sang Rafael B. Lacson Memorial High School sa Talisay City kag sang Mayo 10 gid lamang nakuhaan man sang marijuana ang 18 anyos nga Grade 11 student sang nasambitan nga buluthuan.
Sa interview sang Bombo Radyo kay Police Captain Judesses Catalogo, spokesperson sang NOCPPO, may yara sang ginapatigayon nga symposium activities sa anti illegal drugs ang Talisay City Police Station apang matapos ang duha ka insidente nga pagkumpiskar sang marijuana sa duha ka estudyante, magakoordinar pa ini sa Local Government Unit kag Department of Education agud madesisyunan ang approach nga dapat gamiton sa symposium.
Sa karun, yara na nakahunong ang 21 anyos nga estudynate sa Talisay City Police Station kag napasakaan na sang kaso nga paglapas sa RA 9516 ukon illegal possession of explosives kag RA 9165 ukon Comprehensive Dangerous Drugs Act of 2002.
Samtang ang, 18 anyos nga Grade 11 student naman ang posible nga pasakaan man sang kaso nga RA 9165 sa masunod nga semana, samtang may yara pa sang ginaproseso nga dokumento.
Mensahe ni Catalogo sa mga estudyante, nga wala sang maayo nga dala sa lawas ang illegal nga druga kag ini makaguba lamang sa paminsaron sang isa ka persona.
