Nagdangat sa masobra tatlo ka milyones ang balor sang halit sa naglulntad nga sunog sang Sabado, Mayo 13, 2023 sa duha ka area sa siyudad sang Bacolod.
Sa interview sang Bombo Radyo kay Senior Fire Officer 4 Paul Antonio Garin ang Bacolod City Fire Station, duha ka sunog ang nagluntad sa duha ka area sang Bacolod City.
suno diri, alas 4:32 sang hapon sang may nagluntad nga sunog sa Zone Dalia, Villa Villeta, Brgy Estefania, Bacolod City sa balay nga ginapanag-iyahan ni Lorena Calip.
Nagdangat lamang sa anom ka minutos ang pagtapna sang sunog kag alas 4:43 sang gindeklarar nga fire out ang area.
Totally damage naman ang balay ni Calip kun sa diin nagdangat sa kapin P1, 050,000 ang balor sang halit.
Samtang, sa kasubong man nga adlaw, alas 10:58 nagsugod ang sunog sa Zone 12, Brgy Handumanan, Bacolod City.
Suno kay Garin, tatlo ka balay ang totally damaged kag isa ang partially damaged kun sa diin apat ka pamilya ang apektado.
Ang tatlo ka balay ginapanag-iyahan sanday Barbie May Belano, Beverly Belano kag Jose Donald Allaga, samtang ang partially damaged naman ang ginapanag-iyahan ni Berserey Belano.
Nagdangat sa kapin P2, 400,000 ang balor sang halit sang sunog.
Samtang tubtob sa karun, wala pa nahibaluan kun ano ang ginhalinan sang sunog sa duha ka area.
Apang, nagpanugyan si Garin sa tagsa nga i-off ang mga gasul matapos magluto, patyon ang mga appliances kun wala ginagamit kag i-practice ang Exit Drill in the Home ukon EDITH agud makaplano kun diin ang mahimo nga exit ukon lugar nga makatipon ang pamilya kun may sunog nga magluntad.
