Ginkumpirmar sang Victorias City Disaster Risk Reduction Management Office (CDRRMO) nga napatay ang isa ka 36 anyos nga lalaki nga nagasakay sa karbaw matapos naigo sang kilat sa Hacienda San Jose Gaston, Barangay 8, Victorias City alas-5:30 kahapon sang hapon.
Sa inisyal nga impormasyon nga ginpadangat sa Bombo Radyo Bacolod, ang biktima ang ginkilala nga si Elmer Sustiger, 36 anyos, may asawa kag residente sa nasambit nga lugar.
Kahapon, hinali na lamang nagbubo ang madamol nga ulan sa pila ka bahin sang probinsya kalakip na sa Victorias City nga gin-updan sang mga pagpangilat kag pagpanaguob.
Si Sustiger ang papauli na kuntani sakay sa karbaw matapos nag-arado sa kampo sang tubo sang siya ang naigo sang kilat.
Suno sa Victorias CDRRMO, ginkumpirmar sa ila sang Emergency Clinic sa syudad nga ang biktima ang gindeklarar nga dead on arrival samtang napatay man ang ginasakyan sini nga karbaw.
