Ginalantaw sang alkalde sang syudad sang Bacolod nga magapasaka ini sang class suit batok sa Central Negros Electric Cooperative bangud sa pagfluctuate kag masami nga power interruptions nga nagtuga sang pagkaguba sang mga appliances sang mga residente sa syudad sang Bacolod kalakip na ang bag-o sini nga air conditioner.
Suno kay Bacolod City Mayor Alfredo Benitez, nga ginpatsekyar sini sa legal kun ano ang maayo nga obligasyon sang CENECO sa mga pumuluyo sang syudad kag nakita nga sa idalom sang Republic Act 9136 ukon ang Electric Power Industry Reform Act of 2001, ang CENECO ang dapat mangin consistent sa Distribution Code nga nagarequire sa pagdistribute sang quality electric power sa hilway kag efficient nga pamaagi nga may high degree of reliability.
Ginpunto man ni Benitez nga ginpahayag man sa Article 2176 sang Civil Code, nga kun may maguba nga kagamitan bangud sa kapabayaan sang bisan sin-o ang obligado ini nga bayaran ang gintuga nga damage.
Suno sa alkalde sa paghangop sini ang CENECO ang dapat may yara sang protection system nga kun may yara sa fluctuation sa supply, indi ini makaapekto sa supply nga ginagamit sang mga konsumidor.
Suno diri, dapat may ibutang ang electric cooperative sang equipment agud masiguro nga maproteksyunan ang mga konsumidor.
Suno pa kay Benitez, kun may yara sang salabton ang electric cooperative, indi ini magduha-duha sa pagpasaka sang reklamo batok sa natungdan.
