Ginalantaw sang provincial government sang Negros Occidental nga hatagan sang animal insurance ang mga hog raisers nga naapektuhan sang masakit nga hog cholera.
Suno kay Negros Occidental Governor Eugenio Jose “Bong” Lacson, ginalantaw nga hatagan sang bulig ang apektado nga hog raisers nga kaangay sa crop insurance nga ginahatag sa mga rice farmers kag nagapakig-angot na ang probinsya sa Philippine Crop Insurance para sa ginaplano nga animal insurance.
Wala sang indemnification ukon bulig nga mahatag sa mga hog farmers agud nga maulian ang kapierdihan sang mga ini sa tion nga mapatyan sang mga kasapatan magluwas na lamang nga magrepopulate.
Ini kasunod sang pagkapatay sang mga baboy sa pila ka bahin sang probinsya partikular na sa 3rd kag 4th District bangud sa hog cholera.
Liwat nga ginpahayag sang gobernador nga base sa impormasyon nga iya nabatunan gikan sa Bureau of Animal Industry (BAI), ang masakit nga ginabatyag sang mga baboy kag indi African Swine Fever ( ASF ) kung sa diin madamo ang naapektuhan sa 3rd District kag 4th District kasunod sang indi man malipod nga nagatuga sang kahangawa ang pagkalamatay nga mga baboy sa publiko.
Madamo naman sang backyard hog raisers ang nagbaligya na sang ila mahimo maihaw nga mga baboy sa manubo nga presyo sa kahangawa nga mapatay lamang ang sapat apang wala man nagabag-o ang presyo sang karne sang baboy sa merkado nga nagapabilin sa P280 tubtob P300 ang presyo kada kilo.
