Lakip sa suhestyon sa ginpatigayon nga meeting sang mga opisyales sang provincial government sang Negros Occidental sa mga alkalde sa banwa kag ciudad nga naapektuhan sang hog cholera, nga mas maayo nga ang pumuluyo sang isa ka ciudad ukon banwa ang mangin konsumidor mismo sang ila nga baligya nga baboy, kag pagahugtan nga indi ini makagwa sa kada border sang local government units.
Sa interview sang Bombo Radyo kay Negros Occidental Governor Eugenio Jose “Bong” Lacson, sa data sang Provincial Veterinary Office, masobra 2,400 na ka mga baboy ang nagkalamatay sa probinsya humalin sang nagligad nga bulan.
Sang Martes, nagpagwa man ang gobernador sang Executive Order No. 23-19 series of 2023 ukon ang Activation of Incident Command System, Structure, Composition and Function as Response and Management Mechanism for Animal Biosecurity Threat.
Suno diri, ang EO nga ginpagwa nakasentro sa pagmonitor sa mga area nga may dako nga casualty sa ila nga baboy.
Sa meeting nga ginpatigayon, isa sa mga suhestyon sang mga local chief executives nga wala na sang makagwa pa nga mga baboy sa isa ka ciudad ukon banwa kag hugton ang pagbantay sa kada border agud maproteksyunan ang mga kasapatan kag indi maglapta ang sakit sa katupad nga ciudad ukon banwa.
Sa karun pagahugtan sang Provincial Government ang pig dispersal sa sulod sang probinsya.
Dugang pa niya, isa sa rason kun ngaa madamo sang baboy ang ginamasakit bangod sa kakulangan sang bakuna sa luyag sang raisers nga makatipid, kag ang pagginutok sang baboy sa sulod sang tangkal nga suno sa gobernador dapat may ligwa ang mga ini agud mahatagan sang maayo nga sitwasyon ang mga baboy.
