Ginapasalamatan sang vice president sang Community Animal Rescue Efforts Inc. (CARE) nga amat-amat na nga nagarecover ang ido nga si Paksi matapos gina-alegar nga ginhimuslan sa Barangay Villamonte, ciudad sang Bacolod.
Sa interview sang Bombo Radyo Bacolod kay Ai Ai Gamboa, sang ila ginrescue ang ido, ini ang buhi apang indi na makahulag kag indi mamuklat ang mata gani ginapinsar sang mga ini nga indi makasurvive ang sapat.
Ginapasalamat na lamang sang mga ini nga makaligad sang duha ka adlaw makahulag na si Paksi apang ini ang indi pa maayo makatindog.
Isa ka beses naman nga ginseizure ang ido kag ginakakulbaan nila nga ini ang masulit bangod ini ang magapakita nga may-ara sang brain damage ukon hemorrhage ang sapat ilabi na nga nagcrack ang skull sini.
Si Paksi ang narescue mismo sa sulod sang banyo sa balay sang suspetsado, apang ini ang padayun nga nagapanginwala nga may kaangtanan sa natabo sa ido.
Ang ido ang may-ara sang crack sa skull gani ginalantaw nga ini ang ginlampusan kasubong man ini ang nagapisik kun hikapon sa lawas gani mahimo nga ini ang ginkastigo.
Nagahubag naman ang kinatawo sini kag santo sa doktor, ini ang ginsudlan sang matig-a nga bagay.
Indi pa matumod kun ang ido ang ginhimuslan ukon ginsudlan lamang sang mga bagay ang kinatawo sini, apang santo sa mga residente sa palibot, nabatian nga nagapiyangak ang ido humalin alas-12:00 sang tungang gab-i tubtob alas-3:00 sang kaagahon.
Suno kay Gamboa, wala sang laboratory sa Bacolod City nga makatumod kun may semen sa kinatawo sang sapat.
Magapangayo naman ang CARE sang bulig sa Barangay nga ma-imbestigaran agud nga kun mapamatud-an nga ang suspetsado amo ang nag-abuso sa ido, ini ang mapasakaan sang kaso agud nga indi na ini masulit pa sa iban nga mga sapat.
Suno kay Gamboa, kun nahimo sang suspetsado sa ido, indi malayo nga ini ang mahimo man sa mga kabataan nga babayi sa palibot.
Samtang luyag naman sang mga ini nga mabatian ang bahin sang suspetsado gani magatambong ini sa natalana nga paghinun-anon sang agalon ni Paksi kag sang suspetsado sa Barangay.
Ginapanawagan naman sang CARES ang kooperasyon sang mga mahimo nakawitness sa insidente nga magpagwa sang statement kag indi magkahadlok sa pagsugid, samtang panawagan naman sang mga ini sa kapulisan nga suportahan ang Animal Welfare Act kag himuan sang tikang ang mga complaints batok sa Animal Cruelty.
