Pasado na sa third and final reading sa Sangguniang Panlungsod sa syudad sang Bacolod ang gin-amyendahan nga ordinansa nga nagaestablisyar sang tow-away zones sa pila ka mga dalanon sa syudad sang Bacolod kag nagapahanugot sang pag-impound sang mga salakyan.
Ang gin-amyendahan nga ordinansa ang gin-author ni Committee on Transportation chairperson Councilor Al Victor Espino.
Sa interview sang Bombo Radyo Bacolod kay Espino, ginpasakaan sini ang balayran kag mga penalidad sa mga magabayolar sang ordinansa kag nagbutang sang guidelines kag standards sa pag-accredit sang mga pribado nga mga towing companies.
Suno kay Espino, bangud ang ordinansa ang napasar lima na katuig ang nakaligad, kinahanglan nga iadjust ang mga penalidad nga ginalakipan sang clamping,towing kag ukon impounding fees.
Suno sa konsehal, sa pag-amyendar sang ordinansa, ginpasakaan sang fees kag taripa matapos nga madugay naman ini nga wala mapatuman.
Suno diri, ang intensyon sa hugot nga pagpatuman sang ordinansa ang pagmitigate sang traffic sa syudad.
Nagrekomendar man ang konsehal nga imodel ang ginahimo sang Metro Manila Development Authority (MMDA) kun sa diin magabutang sang isa ka lugar para sa impounding area sang matow nga mga salakyan.
Suno kay Espino, ginalantaw man sang alkalde sang syudad sang Bacolod nga ang city government nalang ang mabakal sang tow truck.
Sa karun wala pa sila sang nakita maaccredit nga pribado nga towing companies.
