Nagdangat sa pito ka balay ang nagkalaguba samtang isa diri ang totally damaged matapos maglabay ang isa ka buhawi sa Barangay Bantayan, Kabankalan City, Negros Occidental kahapon sang hapon.
Sa interview sang Bombo Radyo Bacolod kay Barangay Kagawad Cesar Laurico sang nasambit nga Barangay, ang naapektuhan sang buhawi ang nasakupan sang Purok Lower kag Upper Baras, Barangay Bantayan, Kabankalan City kag ang buhawi ang nagtuhaw mga alas 3:00 ang takna kahapon sang hapon kag naglawig sang kapin duha ka minutos.
Ginguba sang buhawi ang pito ka mga balay nga nahamtang sa duha ka nasambit nga purok.
Suno kay Laurico, isa sa pito ka balay ang totally damaged matapos nga ginhakwat ini sang buhawi kag ginlampos.
Magtimbang nga bahin sang luogar ang gin-agyan sang buhawi.
Suno kay Laurico, ginpalid sang buhawi ang mga atop sang apektado nga mga balay kun sa diin nagkalabasa ang mga gamit sa sulod sini bangud matapos ang buhawi tuman kabaskog nga ulan kag may upod nga kilat.
Antes ang buhawi, nakita sang mga ini gikan sa Barangay Hall nga tuman ka itom nga gal-om sa kalangitan kag makaligad ang pila ka minutos, naghuyop ang hangin nga tuman ka baskog kun sa diin ang sanga sang kahoy sa palibot sang bilog nga Barangay ang nagkalakakas man.
Wala naman sang casualty ukon nasamaran bangud ang pamilya sa sulod sang ginhakwat nga balay sang buhawi ang una na nga nagpasilong sa katupad sang ila balay.
Suno kay Laurico, matapos ang pag-ulan, nagpadulong ang Purok Chairman sang duha ka nasambit nga Purok sa Barangay agud nga magpahibalo nga may nagkalaguba na nga balay.
Ginrespondehan man nila ini kag ginkuhaan sang pictures kag videos agud mapangayuan sang bulig sa syudad sang Kabankalan.
Nagpahayag naman ang bise alkalde sang syudad nga mapadala ini sang bulig sa mga naapektuhan sang paglabay sang buhawi.
