Lunsay pilason ang apat ka sakay sa duha ka tricycle matapos nabungguan sang L300 Van sa National Highway sa Purok Mabinuligon, Valladolid, Negros Occidental kagab-i.
Sa interview sang Bombo Radyo Bacolod kay Ryan Morado, nakabunggo sa may tricycle nga may dala nga green shell nga pareho man niya nga nagikan sa banwa sang San Enrique bangud wala niya ini na natalupangdan nga yara ini sa iya nga unahan bangud wala ini sang suga kag madulom ang lugar bangud nagainulan kag dugang pa nga nagadali man ini bangud mabakal pa siya sang hose nga gamiton sang ginahapo niya anak.
Wala man ini nakahibalo kun sa diin maghalin ang L300 van.
Gindapatan sang nagakaigo nga pagbulong sanday Lavelia Confesor, driver sang vehicle 2 kag Novemae Confesor pasahero ni Lavelia lunsay mga residente sang Brgy. Gargato, Hinigaran kasubong man si Morado kag si Ryaenn Morado pasahero ni Ryan kag lunsay mga residente sang Barangay Tabao Rizal, San Enrique, Negros Occidental.
Samtang suno naman kay Ricky Dillomes, 40 anyos kag residente sang Barangay Aguisan, Himamaylan City, driver sang L300, wala niya natalupandang ang tricycle kag ulihi na sini nakita bangud gin -aligar sini nga madasig ang pagpadalagan sang mga ini kag nagovertake sa iya samtang sang may nagovertake man sa tuo sang van nga namaneho sini, nagbalabag ang salakyan nga gintunaan sang insidente.
Ginpahayag naman ni P/Capt. Bonifacio Galvez Jr., deputy chief of police sa Valladolid Municipal Police Station, nga sa ila nga pag-usisa sa driver sang isa ka tricycle nga si Ryan Morado, angkas sini ang iya menor de edad nga bata nga residente sa Barangay Tabao Rizal, San Enrique kag sila ang nagasunod sa isa pa ka tricycle nga ginadala naman ni Lavelia Confesor angkas ang utod sini nga si Novie Mae Confesor, lunsay residente sa Barangay Gargato, Hinigaran kag may karga nga mga green shell.
Apang bangod nagaulan kag wala sang tail light ang tricycle nanday Confesor, wala ini natalupangdan ni Morado kag iya nga nabungguan ang likod.
Bangod sa impact, naglikaw ang tricycle sang mag-utod kag nagtabok sa opposite lane kun sa diin nagasugata naman ang L300 Van nga ginamaneho ni Ricky Dillones sakay ang iya nga helper nga mga residente sa Barangay Aguisan, Himamaylan City, nga nagresulta sa head-on collision.
Gin-athag ni Galvez nga wala sang may nag-overtake nga tricycle kag nabungguan lamang ang likod nga bahin sang isa pa gani natabo ang insidente samtang yara naman sa husto nga lane ang van.
Lunsay gindala naman sa Valladolid District Hospital ang apat ka sakay sang duha ka tricycle.
Suno kay Galvez, wala pa nila nakasugilanon ang mag-utod nga Confesor bangod lunsay yara pa ang mga ini sa Emergency Room sang ospital.
