Gintupok sang kalayo ang isa ka balay sa Purok Narra Extension, Phase 4, Barangay Handumanan, Bacolod City pasado alas 11:00 kaina sang aga.
Sa inisyal nga impormasyon nga nakuha sang Bombo Radyo, apat tubtob lima ka pamilya ang nagapuyo sa compound.
Sa interview sang Bombo Radyo kay Reynante Mullet Consigna, isa sa mga naga-istar sa nasunog nga balay, nagikan sa kwarto sa likod ang kalayo.
Bangud nga himo ang balay sa light materials, madasig nga naglapta ang kalayo kag wala gid ini sang may nasalbar.
Suno sa iya, natingala ini kun diin naghalin ang kalayo bangud wala man sang may nakasaksak nga appliances.
Suno kay Consigna, sila ang nagaangot sang kuryente sa slaughterhouse sa likod sang ila balay bangud sila ang didto man nagatrabaho kag nagabayad man ang mga ini para sa kuryente.
Suno sa iya, sa 16 ka tuig sini nga pagpuyo sa lugar, ini ang labing una nga kahigayunan nga may nagluntad nga sunog.
Gilayon naman nga nagresponde ang firetruck sang Handumanan gani natapna ang kalayo.
Wala naman sang may nasamaran ukon napilasan sa sunog.
