Lima ka miyembro sang New People’s Army ang napatay kasunod sang tatlo ka engkwentro batok sa mga miyembro sang 62nd Infantry Battalion sa Barangay Quintin Remo, Moises Padilla, kaina sang kaagahon.
Sa interview sang Bombo Radyo kay Brigadier General Orlando Edralin, commander sang 303rd Infantry Brigade, nagpatigayon ang 62nd IB sang combat operations bilang response sa impormasyon tuhoy sa ginaplano nga atrocities sang mga NPA sa Moises Padilla kag La Castellana sang ila naka-engwentro ang rebelde nga grupo.
Ang una nga engkwentro ang nagluntad alas 5:05 sang kaagahon sa Sitio Napiluan kun sa diin 14 ka mga NPA ang naatubang sang militar kag nagdugay sang napulo ka minutos.
Sa ikaduha nga engkwentro, anum ka mga NPA ang nakasumpong sang 62nd IB alas 5:40 sang kaagahon sa Sitio Oway-Oway nga nadugay man sang napulo ka minutos.
Sang sila ang nagwithdraw sa nasidlangan nga bahin, isa nanaman ka engkwentro ang natabo matapos namonitor sang militar ang lima ka mga rebelde sa nasambit nga sitio kag nadugay ini sang lima ka minutos.
Suno kay Edralin, lima ka mga bangkay ang narecover kun sa diin apat ang lalaki kag isa ang babaye.
Sa karun wala pa sang identity ang mga ini kag magapangayo pa sang bulig ang militar sa mga anay rebelde agud i-identify ang mga bangkay.
Wala naman sang may nasamaran sa tropa sang gobyerno.
Narecover sa crime scene ang isa ka M16 rifle, duha ka calibre 38 pistols, isa ka KG9 machine pistol, isa ka UZI machine pistol kag magazine assembly, duha ka homemade 12 gauge shotgun, apat ka bala sang rifle grenade, apat ka calibre 38 live ammunition, isa ka 12 gauge ammunition, duha ka calibre 45 magazines, duha ka baofeng radio, isa ka keypad nga cellphone, 15 ka mga backpacks, isa ka bandolier, isa ka NPA flag, food supplies, medical paraphernalia, enemy war material kag mga personal nga kagamitan.
Suno kay Edralin, indi magnubo sa 252 ka pamilya kag 651 ka mga indibidwal ang nag-evacuate kag yara sa karun sa nagkalain-lain nga evacuation centers sa banwa.
Ang bangkay sang lima ka mga NPA ang igaturn-over sa Moises Padilla Municipal Police Station samtang nagapadayon pa ang hot pursuit operation sang mga militar sa encounter site.
Nakabugtaw naman sa linupok ang isa ka residente sang Sitio Upper Buenevista, Barangay Quintin Remo, Moises Padilla kaina sang aga.
Sa interview sang Bombo Radyo kay Patrick Saludares, tulog pa ang mga residente sang nagluntad ang engkwentro kag sila ang nakibot na lamang sang nagalinukpanay na.
Suno kay Saludares, ang iya pamilya ang yara sa Sitio Napiluan gani nakig-angot siya sa mga ini kag sila ang nagdulhog na sa barangay hall agud maka-evacuate.
Hilway naman ang sitwasyon sa Sitio Upper Buenavista gani nagatinir lamang sa ila puluy-an sanday Saludares kag magasunod man in kaso nga may mando sang evacuation.
Suno diri, masami na nila nga nagakabatian nga may nagaluntad nga encounter sa ila lugar.// Nagapasalamat lamang ini nga wala sang sibilyan nga nadalahig sa engkwentro.
