Ginkalipay sang chief executive officer sang Metro Bacolod Chamber of Commerce and Industry (MBCCI) ang pagdeklarar nga insurgency free ang Bacolod City bangud ini ang maka-ingganyo sa mga negosyante nga magsulod kag magpalapad sang negosyo sa siyudad.
Sa interview sang Bombo Radyo kay Frank Carbon, sa karun nga nangin masanyog ang peace and order sa siyudad, ini naka-atract sa mga negosyante kag makapalapad sang negosyo nga magkatuga sa pagdamo sang trabaho.
Suno diri, kun may trabaho, mas manubo ang rate sang krimen, kasubong man nga may yara na sang palangabuhian ang mga amay kag iloy agud ila mapa-eskwela ang mga kabataan.
Dugang pa niya, kun wala sang gamo sa siyudad, madamo sang mga tawo ang magasulod kag magalagaw sa Bacolod, agud maglibot ang kwarta kag magdamo pa gid ang negosyo.
Samtang, Suno kay Carbon, siya kaupod ang mga business sector, nakigkita kay acting city director sang Bacolod City Police Office Police Col. Noel Alino, kun sa diin aminado ang city director nga may kakulangan sa police visibility ang kapulisan.
Kag bilang solusyon plano sini nga ipaidalum sa training ang mga tanod kag mga security guards nga mangin force multiplier sang kapulisan.
Suno kay Carbon, sila nga mga business sector magakoordinar man nga sila ang mahatag sang gasolina para sa Highway Patrol Group agud mapasanyog ang police visibility sa siyudad.
