24 oras ang pagbantay sang mga Barangay Tanod sa Murcia-Bacolod border sa Barangay Blumentritt, Murcia, Negros Occidental para sa mga nagasulod nga baboy ukon manok.
Ini matapos nga nagdangat na sa masobra 2,500 ang mga baboy nga napatay bangod sa Hog Cholera.
Nagmando naman ang Provincial Government sa pagbantay sa mga border sang mga banwa kag syudad nga may mataas nga kaso agud indi malatnan ang mga baboy sa iban nga lugar.
Sa interview sang Bombo Radyo Bacolod kay Barangay Blumentritt Chief Tanod Ariel Mondejar, sila ang nag-umpisa sa pagtukod sang border checkpoint sang Mayo 17.
Aminado ini nga sa una nga adlaw nagdangat sa 17 ang ila nga napunggan nga mga salakyan nga may dala nga baboy ukon manok nga magatabok kuntani sa syudad sang Bacolod apang kulang sang papelis.
Suno kay Mondejar, duha lamang ang ginapangita nila nga dokumento sa mga motorista kag ini ang ginalakipan sang Veterinary Health Certificate kag Authority to Transport.
Ang wala naman sang dala nga dokumento ang ginapanugyan nga magbalik na lamang samtang kun kulang naman ang numero sang baboy ukon manok nga nakabutang sa papelis, ginapabalik man sang mga ini ang wala nalakip sa listahan.
Suno diri, sa karun tumalagsahon na lamang may nagalabay nga may dala nga baboy ukon manok kag indi naman ang mga ini kinahanglan nga papunduhon bangod ang mga motorista na mismo ang nagadulog kag nagapakita sang ila papelis.
Kalabanan sa mga ini ang nagabyahe pasulod sa Bacolod City agud nga dal-on ang mga baboy sa slaugther house sa syudad.
Paathag ni Mondejar nga baboy lamang kag manok ang ila nga gina-estrikto kag ginapahanugutan lamang nga makatabok ang iban nga mga kasapatan.
